新世界發展（017）創辦人鄭裕彤入院第10日，鄭家上下為證明一切如常，照常出席公開活動，但就封嘴唔講彤叔病情。有傳彤叔情況好轉，由深切治療部轉番去私家病房，大仔鄭家純昨晚亦有到醫院探望。
周六照舊娶妻
新世界系幾間上市公司呢兩日先後公佈業績，純官個仔彤叔個孫鄭志明（Brian）噚日如常出現主持新創建（659）業績會，唔知係咪呢輪經常出入醫院，擔心阿爺病情，又要籌備周六婚禮，佢個樣都幾殘，希望佢快啲精神番，做個靚仔新郎啦。
彤叔細仔鄭家成噚日出席一個慈善活動，對於老父情況亦係十問九唔應。純官傍晚去探彤叔，佢戴住口罩，依然冇乜表情，難以猜測彤叔最新情況，不過今日係新世界發展公佈業績，純官照例會主持記者會，往年佢暢所欲言，由政府政策到公司業務，乜都講，今日唔知會唔會例外呢？
