雖然骨子裏係架商用柴油客貨車，但平治Vito比好多日系MPV更好玩，柴油偈慳油好力之餘，靚仔外形加特大星章，亦驗明貴族正身，最正係加推原廠車尾單車架，興之所致，都可隨時踩入郊外嚟個單車遊舒展身心。學冰皮月餅廣告話齋，商用車都可飛甩老土嘅。 記者：徐影龍 攝影：周旭文 模特兒：Anladia@GME
單車上架慳尾箱
唔計要2號車牌先揸得，基本上平治Vito可當係MPV咁用，未講車櫳有幾舒服，先睇原廠加推嘅單車架；鋁金屬物料，摺合式設計夠靈活，硬淨得嚟唔會加重車身負荷，打開時足可穩妥安置兩部單車。對於短陣版Vito嚟講，的確慳番唔少尾箱空間，因為單車唔能夠直放尾箱，而必須斜擺，若要運載兩部以上單車，尾箱就未必有足夠空間喇。就算買返嚟主力當公司車或搵食車，都可將單車跟身同行，假日隨時都可跟家人來個單車暢遊，根本無藉口唔做運動。
由於安置單車後有機會阻擋煞車燈，故單車架另設尾燈及電源供應，而且安裝位置高，唔怕遮住車牌，睇得出設計上用心之處。唯一略嫌車架裝得太高，個子小嘅，擺單車時會較吃力。
靚仔賣相似MPV
由頭睇到落腳，Vito無忽似貨Van，橫長鬼面罩配品牌星章，再搭精靈大頭燈，前面睇已覺幾靚仔，企側睇，一列梯形窗口設計、五輻式輪圈，比好多日系MPV來得型仔。尺碼4,763×1,906×1,902mm，座位間隔雖未算超級闊落，但仿皮座椅軟熟舒服，左右空間寬鬆，中排坐三個大肥佬都唔怕貼晒身。當然法例所限，不設第三排座椅及必須同尾箱間隔密封，唔多適合三代同堂大家庭，但一家五口絕對可當佢私家車咁用，車價31萬多啲，亦比好多日系MPV平，對於有2號Van仔牌嘅，絕對可考慮「公私不分」、實用好玩兼備嘅Vito。
雖然只配2.2公升直四引擎，但車身輕盈及扭力夠大，駕駛感有着大車少有嘅澎湃衝刺力量表現，軚感同入彎循迹性算不過不失，以近兩米高車身，算相當穩定了。唯一可惜係個+/-波箱，其實係普通自動波嘅2波或L波，若能玩盡真正五速+/-，Vito表現肯定更好玩。
Mercedes-Benz Vito
引擎：2,143cc直四
馬力：163hp/3,800rpm
扭力：360Nm/1,600-2,400rpm
傳動：五速自動波箱
售價：$318,000
查詢：2895 7248（仁孚行）
