大快活（052）最近玩時光倒流，每個飯盒只係賣4蚊雞，仲有粟米肉粒飯同吉列豬扒火腿飯揀，結果吸引大批市民晨早排隊搶購。記得唐牛讀書嗰陣，學校係幫襯大家樂（341）外賣飯盒，當年都要10蚊一盒，難怪今次大快活賣大包，唔使半個鐘就沽清。今次限量賣4300個飯盒，以原價35蚊一盒計，即大快活只係畀多十幾萬銀出嚟，就成功攞咗各大報章嘅頭條位，成效好過齋賣廣告多多聲，「孖屐亭」人應該一功。噚日叫戰友趁突破買入嘅莎莎國際（178），埋單都有1.4%進賬，跑贏大市，今日繼續向破位股埋手。光大國際（257）上月底宣佈以每股3.58元批股，集資12.5億銀，消息雖曾拖累股價大震盪，但批股價就牢不可破，經過一個月整固後，成功補回下跌裂口，噚日更以大陽燭破位，走勢一流；現價4元可買入，短線上試年中高位4.30元，都有近8%上升空間。唐牛