不知甚麼時候開始，學費與消費掛起鈎來，所以學生都以消費者即是「老細」心態自居。交了學費就財大氣粗，有理冇理一於投訴。有報讀IVE的國際酒店款接管理高級文憑、自稱「未成年」的同學，被派到迪士尼實習，做樂園服務款待專員，負責清潔工作，每周一日為期10個月。同學投訴「匿埋洗廁所」如何與旅客溝通，跟學科「款接」有何關係，「老師強詞奪理話洗廁所都可以同旅客溝通」；「一年學費成5萬蚊，要匿埋學洗廁所，同期望落差好多，有啲同學選擇退學。」大拿拿5萬蚊學費，課程內容該以「老細」為本才對，IVE應該好好檢討！事實上不管你是哪間一流大學酒店管理系畢業也好，表面風光但其實壓力大又時間長，所有職位一律全部由低做起，十號風球一樣要準時當值輪班，捱不得的根本就不應該做酒店。況且無論高低級數，面對的都不是「人咁品」的客人，這班少爺小姐兵EQ低又冇AQ如何應付？無謂累己累人，即時退學不失為一個明智的決定！其實要學洗廁所的何只酒店？有說廁所是一間餐廳的尊嚴所在！連鎖快餐及雪糕名店的員工，入職第一件事就是學洗廁所，有Trainee因此馬上劈炮，亦有人用一年時間洗到變成分店經理。同學認為洗廁所冇嘢學又話冇得同旅客溝通。光顧樂園的不論甚麼國籍都是客，廁所內員工一樣大把機會和客人交流。再講，即使外表裝修得美輪美奐又如何？一個又臭又污穢的廁所足以破壞一切良好印象。有日本企業要求員工輪流洗廁所，合格標準是，負責清潔的員工直接飲用馬桶中的水。變態？各位可有興趣猜猜當中道理？張慧敏 http://www.facebook.com/HKcareerdoctor