【Interview專訪】
近十年力寶（226）系在港幾乎消聲匿迹，為挽回力寶在港的聲威，第二代掌舵人李棕兩年前創立力寶投資管理，並親自揀蟀，銳意在金融服務市場闖出名聲。力寶投資管理行政總裁（CEO）郭偉良坦言：「（李棕）除咗錢之外，連佢自己嘅面子甚至連人際網都交埋出嚟俾我哋，連老細都咁落力，我哋唔可以衰畀佢睇！」
記者：陳韻妍
力寶系近年專注拓展東南亞地產業務，本港地產業務相對停滯不前，但李棕原來並未放棄本港市場，只是以另一種方式「回歸」。2003年認識李棕的郭偉良接受本報專訪時說：「我仲做緊基金經理時已識佢，佢都知我鍾情地產，所以大家有傾有講，佢一直都想喺中港兩地延續返佢哋嘅金融業務，但唔想好草率咁做。」
推地產ETF買前景
兩年前，郭偉良離開道富，李棕即力邀其加盟，力寶投資管理才正式成立，主攻ETF（交易所買賣基金），今日掛牌的力寶專選中港地產ETF（2824）是其頭炮ETF產品。郭偉良表示，近兩年前全球開始對貨幣失去信心，「歷史話俾我哋聽如果不斷印錢，實物資產表現較好，好似房地產同黃金」，加上母公司力寶主打地產事業，遂決定與恒指服務公司合推力寶中港地產指數，繼而推出追蹤這個指數的ETF。聯儲局兩周前推出第三輪量化寬鬆貨幣政策（QE3），猶如為本港熾熱的樓市「火上加油」。他表示，本港一手樓供不應求，故雖然成交量持續下降，成交額卻隨着樓價上升而攀升，相反二手樓價量齊升，升勢較為穩健，但無論一手或二手樓，本港樓市向上走的趨勢短期內不會變。由於樓市對息口一向較為敏感，故本港的低息政策對力寶專選中港地產ETF的推出營運是一個利好的環境。他直言，希望這個產品不但可以打入機構投資界，零售層面都可做到「就算我買唔起香港啲樓，起碼我都有渠道買到中港樓市嘅長遠增長。」
感激李棕大力支持
談及李棕對公司的支持，他直言：「實際支持就多囉，首先係錢嘅支持，係無限量不斷支持緊我哋，自從我哋攞到（ETF）批准嗰刻，老闆就不斷同我哋地拉攏咗好多銀行嘅關係」，「三分一（客戶）可能都係老細介紹，佢真係除咗錢之外，連佢自己嘅面子甚至連人際網都交埋出嚟俾我哋。」為表達對力寶專選中港地產ETF，李棕今日更特別飛到本港出席其上市儀式，難怪郭偉良多番強調：「今次上市，我真係好感激我哋老細！」
郭偉良簡歷
現職：力寶投資管理行政總裁歷任：．2000年擔任美國道富銀行及信託分析師．2003年出任美國道富環球投資分析師，其後獲晉升為香港及亞洲股票基金經理學歷：．澳洲新南威爾士大學商業碩士．麥克里大學統計學理學士