【本報訊】成功的廣告人要識「食腦」，但林小琪（Carol）說還要肯「食屎（不錫身）」。林小琪20多年前於中文大學新聞系畢業後，一直在廣告界打滾，過去四年任職上海麥肯光明（McCann）董事總經理，最近成為跨國廣告公司Saatchi & Saatchi（盛世）首位女性南中國區首席創意官兼董事合夥人，對有志入行的年輕人，Carol會問：「你肯唔肯食屎？」雖然過去幾年在上海工作，但Carol一直留意香港新聞，而且曾在中大任兼職講師，經常接觸中港兩地的80、90後。Carol認為兩地新一代都有共通點，就是「講多過做，要求升職加人工就話自己ready，要孭飛又話其實自己唔係咁資深」，尤其香港新一代太「錫身」和受保護。
勿怕孭飛放膽闖蕩
「個個見工都話自己對廣告好有熱誠，但有幾熱誠先？」Carol舉例指，每逢暑假不少人應徵到上海做實習生，香港人知道薪酬是內地水平，熱情瞬間冷卻，有部份則因為沒有親友在上海照顧食宿便打退堂鼓，結果一位上門自薦的鬼仔贏得職位，Carol說：「佢同幾個朋友仔夾錢租又漏水又爛嘅單身宿舍。」近年香港樓價高企，又有雙非和水貨客問題，新一代反地產霸權也反內地人，Carol認同年輕人「係好似冇出路咁，啲嘢又咁貴，又買唔起樓」，認為年輕人沮喪根源來自「冇得發圍」，但正因如此更應拓闊視野，「歐洲經濟差，鬼仔都識得去中國搵機會」。Carol說年輕人要發圍首先要肯「食屎」，打好根基，放膽闖蕩，「唔好做幾年就怨冇得升，半途而廢」。不過，Carol相信每一代人總有精英，例如最近全城反國民教育，Carol便深深被學民思潮黃之鋒打動，令她對新一代充滿信心，因為「有得一個（黃之鋒）就會有好多個」。她指現時內地確實有很多問題，但畢竟是一個充滿發圍機會的戰場，希望年輕人不要「自己封咗自己條路」。
記者：林浚川
