見到梗有一間喺左近嘅咖啡連鎖店，就知道香港人越來越鍾意飲咖啡，生意有得做。之但係，喺地球另一端嘅意大利同西班牙，竟然受到歐債危機拖累，經濟唔好，人均咖啡消費都跌埋，咖啡商可能要搵齊陳豪同佐治古尼兩位「啡佬」幫手救亡先得。英國《金融時報》報道，意大利作為歐洲第三大咖啡入口國（以量計），舊年每人咖啡需求跌至5.68公斤，係六年來最低水平，西班牙人嘅需求亦跌至07年水平。
貴價豆需求減
業內人士指出，過去幾年意大利同西班牙經濟疲弱，令當地人減少咖啡消費，好多南歐人選擇慳番啲，留喺屋企飲咖啡，唔再願意咁貴外出幫襯咖啡店。加上佐治古尼賣廣告嘅咖啡機越來越流行，咖啡機同咖啡膠囊唔算貴（喺香港部機千幾、二千蚊有交易；咖啡膠囊每粒除開10蚊有找），好多人轉飲呢款咖啡。推延落去，較平嘅robusta咖啡豆需求越來越大，貴價嘅arabica咖啡豆少咗人要。作為全球指標市場嘅紐約，arabica價格就由舊年34年來高位（舊年哥倫比亞失收），大跌40%，去到最新嘅每磅1.75美金。雖然香港經濟唔見得好好，但咖啡需求越來越旺，飲咖啡除咗提醒，仲好似好有品味咁（唔知關唔關陳豪事），咖啡店數目好快同七仔有得揮，好似精品咖啡店caffè HABIT?，最近就開咗條副線the Coffee Academics，兩間新店啱啱喺銅鑼灣耀華街同誠品書店開張，睇書唔會瞓着！【歐洲四大咖啡入口國（以量計）】1.德國2.法國3.意大利4.西班牙李華華mailto:[email protected]