言論出位嘅上水鄉委會主席侯志強，上星期講到明有錢連祠堂都可以賣。結果上水鄉委會門外，即刻俾人掛咗張寫住「出賣宗族真豬狗，齊合力踢佢走」嘅橫額，下款仲寫住「我等向狗致敬」。不過班叔伯兄弟唔係鬧侯志強不孝，反而係鬧民建聯北區區議員侯金林。侯志強同八方講，張橫額係上星期五搞新界東北發展計劃居民大會嗰陣，古洞北村民掛上去。佢聽班村民講，因為不忿侯金林表面撐村民，轉個頭就出賣村民，同政府秘密傾賠償，所以掛橫額抗議。侯志強強調自己同侯金林絕無私怨，一定唔係佢整蠱同族兄弟，不過村民火遮眼，擔心自己拆幅橫額落嚟會俾人鬧埋一份，咪由得佢繼續獻世囉。