葉蒨文（沙麗）一連四場紅館演唱會前晚圓滿結束，當晚老公林子祥和繼子林德信依舊上台跟沙麗合唱，場面溫韾。沙麗更和兩位舞者大跳拉丁舞，不過由於過激，令她一度跪在台上喘氣，期間沙麗更高呼要call白車救命。
沙麗在尾場演唱會上依然拼命投入演出，而當晚父母、好姊妹朱玲玲、林建康及太太、李丞責及劉倩婷和黃柏高等則在台下欣賞。個唱期間出面落大雨，曾掛上黃色及紅色暴雨警告，沙麗以半鹹淡廣東話謂：「出面泡（暴）雨，大家聽日要唔要返工？唔理橙風定紅風，最好就唔使返工。」沙麗又自嘲：「我每晚都有睇微博，但我只有千幾fans，王菲就成千萬，我好慘，但我真係會睇留言，阿Lam（林子祥）成日笑我自戀狂。」
快舞甩裙唞氣
當晚沙麗依舊和兩位外籍男舞者合跳拉丁舞，期間她一度甩裙要急忙出手拉着，三人大跳一輪快舞後，沙麗一度不夠氣地跪在地下喘息，她大叫：「Oh my God，要叫bi bu車（指救傷車）啦。」兩位猛男隨即扶起她，沙麗飲水唞順氣後又再跳過，以剛剛度過51歲生日的她來說，體力總算厲害。
當晚阿Lam和林德信（Alex）再度上台跟沙麗合唱《零時十分》，不過阿Lam竟老貓燒鬚甩嘴，接着三人再合唱《分分鐘需要你》，唱畢沙麗指阿Lam近日喜歡說話，他即說：「我叫佢唱番歌好耐，佢走咗咁耐大家都冇忘記，我代佢多謝你哋。」三人和觀眾握手，握完沙麗謂：「你就好，好多女人箍你頸，咁多女人鍾意，林細（指林德信）唔知會唔會咁？」而安哥時杜德偉擔任嘉賓跟沙麗合唱《信自己》，掀起高潮。
爆Alex煲電話粥
慶功宴上沙麗和阿Lam及Alex一同合照，她坦言：「今次真係搏命表演，最辛苦係跳拉丁舞，腰痛，但唔理扭斷照跳。」不過因擔心聲線負荷不到，故暫時未打算開part 2。稍後會否和Alex有合唱機會？沙麗笑言：「佢係都搵火辣辣嘅女仔，好似當年阿Lam搵我唱。我都有留意佢嘅緋聞，成日見佢晚上煲電話粥，但又傾到好辛苦咁，我都想佢遇到明白佢嘅女仔。」
採訪：馬建華
攝影：黃偉雄
