熊在旅途灑淚時，原來係會感動到狼英㗎！當大家以為，狼振英打完齋唔要和尚，冷淡對待幫過佢助選嘅劉夢熊Dream Bear之時，八方發現，狼振英對Dream Bear嘅愛，屬超越兩制嘅高層次，狼英更曾以奪命追魂call越洋「箍煲」；呢種愛，絕非羅范同張震遠等普通梁粉可以享有。
甜笑似原諒咗負心漢
Dream Bear自爆7月20月身在長春考察，miss咗狼振英嘅call，本來冇覆返；點知翌日狼振英再來電，Dream bear以為搵得佢咁急有乜咁大件事，原來狼英只係好窩心咁講咗句：「夢熊，我搵你主要同你講，請你相信我，我唔會過橋抽板！」嘩，八方聽完都覺得毛管戙，Dream Bear講完就笑得甜絲絲，似乎原諒咗坊間盛傳嘅「負心漢」。八方就覺得，狼英雖然話唔過橋抽板啫，但成班梁粉喺狼英當選特首後個個被犒賞，好似羅范同張志剛等被「冊封」做行會，Dream Bear一樣嘢都分唔到，蝕底咗啲喎。原來呢種限於兩制內嘅愛，Dream Bear一啲都唔吼，自爆：「喺兩制層次上，梁振英有自己嘅考慮，但喺一國嘅層次上，佢有推薦我。」推薦佢做乜？相信都係由全國政協委員升呢做全國政協常委，事關呢屆政協常委爭崩頭，冇人照住係差啲；但Dream Bear保釣咁落力，唔使狼英照，阿爺都可能另眼相看啦，奉勸Dream Bear咪咁容易誤信甜言蜜語呀。mailto:[email protected]