香港隊教練摩力克頭痕不止！隊長陳偉豪因傷復出無期，而踢咗港隊12年嘅南華守衞李志豪，噚日突然決定單方面宣佈退隊，雖然摩帥極力挽留，不過，幫香港攞過東亞運金牌嘅志豪去意好堅決，搞到港隊下月中主場友賽馬來西亞鬧中堅荒。
友賽負飛馬 摩帥狂插
港隊為備戰年底喺香港踢嘅東亞錦標賽外圍賽，噚日晨咁早喺蒲崗村同太陽飛馬踢咗場60分鐘嘅非正式友賽，港隊除如常唔齊人，唔知係咪因為嚟緊周六有南、傑等嘅港甲大戰，球員踢得好hea，結果港隊輸1:2。賽後教練摩力克忍唔住插球員踢得差，要乜冇乜，令佢非常失望。
摩帥賽後同港隊球員檢討完後，與助教司徒文俊、潘文迪同范俊業，圍住李志豪傾咗半個鐘；事後摩帥向在場傳媒講，同志豪主要係傾球隊踢法，叫大家唔好咁敏感。點知冇耐，就傳出南華入信足總幫李志豪退隊嘅消息。
李志豪噚晚接受電話訪問時承認退隊：「上場作客輸畀新加坡，教練覺得防守球員出錯導致輸波，當時已有退隊念頭，因輸波係全隊責任，但教練要防守球員孭鑊，唔多接受呢個理由囉。另外，教練每次選好多年輕球員跟操，但踢國際賽A級賽唔係講玩，我覺得應該選最好嘅人去踢至合理。」
「喺港隊練唔到啲乜」
就快30歲嘅志豪仲話，球季開咗，港隊每星期仲要操兩課，球員會有疲態；好似噚日安排友賽咁，其實冇乜意思，唔明點解港隊唔學外國國家隊咁，賽前先徵召當時最好同最有狀態嘅球員出戰：「既然喺港隊又練唔到啲乜，決定同教練講退隊。踢咗港隊咁多年，始終有份榮譽感，退出梗有唔捨得，但覺得係時候專注球會比賽。」
港隊教練向來唔易做，舊年12月接掌港隊嘅摩力克，帶隊9個月，相信已深深感受到有幾難，就算有鳳凰計劃射住都係咁話；家陣全隊中最有經驗嘅後防大將劈炮，加上國際賽掛靴嘅吳偉超、陳偉豪又傷埋，港隊短期內無中堅可用，得番今季未落過場嘅傑志中堅曾至孝同晨㬢新丁袁浚楠，再咁搞落去，呢隊港隊真係冇眼睇！
港隊近期麻煩事件簿
日期：25/09
事件：李志豪宣佈退出港隊
日期：18/09
事件：吳偉超退出港隊
日期：02/09
事件：隊長陳偉豪聯賽第1戰受傷
日期：28/08
事件：南華拒讓謝家強及積施利跟操
日期：15/08
事件：友賽作客吞新加坡兩蛋
日期：12/08
事件：河南建業拒讓高梵歸隊
資料來源：《蘋果》資料室