民主派同建制派喺立法會選舉搶位後，噚日再就未來四年立法會座位「搶位」，閉門抽籤後，泛民繼續同建制派保持楚河漢界。其中較為特別嘅係泛民將位於立法會議事廳最後兩排，而同建制派接壤嘅四個位，就留咗畀人民力量同社民連「長毛」梁國雄。據泛民飯盒會召集人何秀蘭解釋，咁係希望有道防火牆，將呢四位惹火人物同「溫和」泛民隔一隔。至於坐喺人力同長毛隔籬嘅「梁粉」馬逢國同謝偉銓，來屆會否率先「中蕉」，拭目以待。除咗增設防火牆，泛民亦一改過去同黨一字排開嘅安排，改為黨友前後排坐。據講由於新大樓張議員枱太長，黨友坐同一排好難溝通，反而前後傾偈就好易，相信咁佈陣可以方便溝通咁話。