點解吳克儉會做到教育局局長？與其不斷問「點解」，不如聽「吳得掂」現身說法。吳得掂局長噚日出席《城市亂彈》節目時，自爆狼英有次探訪老人院，叫有興趣做局長嘅人留低，點知佢走得太慢，誤被狼英睇中，命運自此改寫。講到呢度，吳得掂幾乎淚眼漣漣，仲老人癡呆，猛問自己點解喺呢度嘅？搞到同場嘅黃之鋒，都唔敢追擊佢。身為煲呔時代嘅政治化妝師劉細良，對狼英大彈特彈，話有啲人冇觀眾緣呢，點化妝都上唔到粉；仲意有所指話，化妝、整容同易容呢三樣嘢係有分別㗎，舉例指新界東北計劃明明係中港融合嘢，狼英卻講到係為解決基層住屋問題，呢啲係政治整容而唔係政治化妝囉。
圍政總要坐喺西翼門口
出走政府嘅細良仲點醒之鋒小弟弟，下次要去圍政府總部，一定要坐喺西翼門口，事關嗰度先最多政府車出入呀。查實呢個吳得掂，只係由《頭條新聞》主持吳志森飾演；如果大家想睇吓真假儉儉邊個可愛啲，不妨喺本周六（29日）晚上7點收睇喺亞視播出嘅新一輯《頭條新聞》。