睇月線圖，發現恒指正面對長線阻力位，20763係月線圖保歷加通道中軸，至於由07年11月高位至今，形成嘅下降阻力線就喺21000附近，家可以話港股處於極關鍵嘅技術阻力位。再睇日線圖，恒指7月至今形成嘅上升通道，近日亦受制阻力線（現延伸至20850）。可見恒指其實喺21000關面對長短線阻力，令港股現水平出現整固。睇周線圖嘅話，港股走勢似乎偏向有利。首先，晉佳之前講過，恒指周線MACD喺舊年11月同今年8月，出現兩個MACD買入訊號，仲要一浪高於一浪，如果MACD線再出現拋離訊息線嘅迹象，走勢就更好；第二，由舊年8月至今，恒指形成對稱三角形，上周已突破阻力線將約20600，本周暫時喺阻力線之上靠穩，亦係利好訊號。如果恒指守得住現水平，再向上突破，就會進一步確認突破周線圖對稱三角形，兼突破月線圖保歷加通道中軸，後市變得相當利好，量度升幅可見27000，不妨等港股明顯突破21000先加注都未遲。個股方面，之前介紹過奶粉股雅士利（1230），股價成功企穩1.50元樓上，稍後有機會突破潛伏底，展開新一輪升浪，中線保持樂觀，至於合生元（1112）亦可以考慮。
奶粉來源有保證
合生元主要入口法國奶粉，然後喺內地進行包裝出售，內地人唔會當佢係國產奶，今年上半年收入升57%，毛利率高達65.6%，純利升四成至2.74億元人民幣。合生元主要由法國Laiterie de Montaigu進口奶粉，後者規模唔算大，所以合生元能夠擁有頗強嘅議價能力，同埋享受高利潤率。合生元今年6月同丹麥老字號奶品生產商Arla Foods簽訂10年期融資供應協議，向Arla Foods提供約1.08億港元融資，並獲對方嬰幼兒配方奶粉產品供應，由2015年起，供應量最多可達每年2萬噸。呢單Deal確保合生元未來有穩定嘅奶粉來源，未來要注意奶源成本有幾高，能否令合生元維持現時毛利率？如果可以嘅話，合生元未來幾年盈利增長相信冇乜懸念。以22倍市盈率作為目標價，上望24蚊，跌穿18蚊止蝕。晉佳本欄逢周一、三及五刊出