愛素顏的挑機話，點解化妝至禮貌？Samantha答：返工攰過鬼，女鬼未上妝面色發白似十年未瞓過覺，為防晨早嚇親街坊，只好化妝扮番個人。好事男又問：點解你哋班女人Well-paid咁多？Samantha答：可能因為你老闆自動Price in咗女員工啲化妝品錢啫，等佢哋贖回青春嘛！每月花過千銀買化妝品，仲要受氣，某日資百貨化妝品櫃台小姐長期過濾自己友，講廣東話者當自己屋企得㗎啦，自便啦！有次黃金周，諗住去化妝零售店自便，點知仲弊，前面三四個操普通話嘅女同胞拎住兩大個購物籃排緊隊，畀錢人使原來都咁難，強烈呼籲化妝品零售商仿效超市開條特快專線！所以零售業放緩，化妝品股一定排除在外，內地人手緊只會買少隻幾十萬的名錶，反會買多幾樽SKII做手信，莎莎國際（178）截至6月底止的首季營業額15.58億元，按年增長18.5%，同店銷售額亦增長12.3%，黃金周唔買化妝品住，不妨買莎莎賺番啲化妝品錢，禮貌地見人好過啦！Samantha本欄逢周一、三、五刊出