同喬布斯一齊創立蘋果公司嘅沃茲尼亞克（Steve Wozniak）62歲先至決定移民澳洲，話見到澳洲政府打算花成2900億港紙搞個全國寬頻網絡，要去發掘商機喎！澳洲政府打算喺2021年前，建立一個超級速度嘅全國性寬頻網絡，全國93%嘅家庭、學校等都會接駁光纖網絡，希望幫助澳洲經濟轉型，成個計劃接近3000億，即刻吸引到Wozniak。佢已經同澳洲寬頻通訊及數碼經濟部長Stephen Conroy摸過底，舉手表示支持，家搞緊移民手續，表明心迹，好有意思為澳洲效力。但佢又保留美國公民身份，兩邊走都得。Wozniak同喬布斯由同學介紹認識，一齊創出第一代蘋果電腦，喺蘋果做咗12年，87年離開，保留股東身份，雖然係咁，但佢都要自己排隊買iPhone 5，冇特權！