一直都搵唔到NBA球隊落班嘅易建聯，周日終於搵到新工啦！不過，佢唔係NBA，而係返CBA重投母會廣東宏遠嘅懷抱，令到中國球員喺NBA「絕種」。阿聯同內地傳媒講，唔會回首，「還是向前看吧！」
傳千萬年薪簽一年
早兩個月其實傳過有歐洲球隊，好似西班牙籃球豪門皇家馬德里，都搵過阿聯，不過佢最後選擇返母會。點解？同廣東簽咗一年約嘅佢話：「如果要在歐洲聯賽和NBA之間做選擇的話，那肯定還是NBA；歐洲聯賽水平確實不低，但CBA現在其實通過這幾年的發展，在競技水平上可以說是縮小了與高水平賽事的距離。」CBA水平同歐洲籃壇，有冇得比就見仁見智啦，不過肯定連皇馬都唔會向一般球員，提供一份1,000萬人民幣嘅一年合約囉。雖然宏遠出千萬人仔邀阿聯回巢只係傳聞，但係以阿聯喺中國嘅市場，傳聞係真都唔出奇。
今夏不獲小馬續約
睇返多位喺NBA打過嘅球員，就只有前火箭巨塔、「移動長城」姚明一個最耀眼；阿聯07年俾公鹿喺選秀錄取，一開始大家都因為佢7呎身高，手長腳長嘅身材，對佢寄以厚望。頭3季喺公鹿同網隊都打得幾唔錯㗎，不過弊在傷患太多。之後被送到巫師之後，阿聯已經被球會投閒置散；上季喺小馬，場均時間只係得約7分鐘咁大把；小馬今季又大量增兵，球會一早已經預咗唔同阿聯續約。
喺NBA冇人要，阿聯點睇？06年俾人踢爆報細數，27歲扮24歲嘅佢話：「我覺得還是向前看吧，不管在那裏打球，最終的目的都是為了提高自己。」咁你畀心機啦，家先「24歲」人，仲有大把機會嘅。
易建聯檔案
籍貫：廣東鶴山
年齡：24歲（27/10/1987）
身高：7呎 體重：250磅
位置：前鋒/中鋒
選秀：2007年第一輪第6選擇（由公鹿錄取）
曾效球隊：
廣東宏遠（2002-2007、2011、2012-）
公鹿（2007-08）
網隊（2008-10）
巫師（2010-11）
小馬（2012）
資料來源：《蘋果》資料室