劉嘉玲昨日應邀到尖沙嘴出席中國當代藝術大師岳敏君的藝術展，岳敏君的作品《處決》在07年曾以約4,400萬人民幣，創下中國當代藝術拍賣的最高紀錄；嘉玲昨日獲岳敏君送贈印上其著名自畫像「儍笑人」的限量版麻雀，嘉玲笑說：「唔捨得用。」
中國當代藝術大師岳敏君近日在海港城舉行香港首個個人公共藝術展「笑可笑 非常笑」，這次展覽將展出五件雕塑及12幅作品，昨日大會邀請劉嘉玲擔任開幕禮嘉賓，原定在露天廣場舉行，但因天雨關係臨時轉入美術館內，岳敏君即場贈送一盒麻雀給嘉玲，據悉麻雀是限量版，印有他著名的自畫像「儍笑人」，嘉玲收到後笑言不捨得用。
盼學油畫增值
嘉玲表示在內地曾於一些場合跟岳敏君見過面，但他的作品太昂貴，嘉玲直言﹕「買唔起。」不過嘉玲與岳敏君同一個年代，揚言十分欣賞他，能從畫中收到訊息，她說：「覺得好驕傲，中國有呢啲咁有創意嘅藝術家。」問嘉玲有否其他藝術收藏品？她說：「有，家由平嘅開始儲，好似字畫同雕塑，但最貴可以係無價，好似大寶法王送畀我嘅字畫。偉仔（梁朝偉）都有儲古董同一啲字畫，屋企永遠唔夠用，不過啲樓太貴喇，唔會搬大啲。」嘉玲並有意學油畫，增值自己。
偉仔最近在訪問中，大讚嘉玲好照顧他，嘉玲聞言甜笑說：「好正常照顧，佢平時都感受到，平時都有讚我，出面就少啲，唔會特別開心，讚唔讚都會咁做，係對一個人有感覺。」嘉玲表示女仔天生有母性，尤其是她，既懂得打理自己，還可以照顧人。
藝術政治分開
此外，曾志偉早前推掉演出日劇及日本政府頒發的感謝狀，遭日本網民轟小器，偉仔也擱置拍攝日本電影，嘉玲說：「日本人都係愛國啫，我哋都係愛自己國家，每件事都有兩面睇，話背叛可以話為國增光，藝術同政治唔好扯埋關係，咁樣會和諧啲，政治同老百性冇關。」
採訪：溫敏芝
攝影：黃偉雄