利豐（494）同沃爾瑪（Wal-mart）關係生變，早已傳遍街，證券界都心照不宣，無論係被cut單、被壓價，總之唔慌係好嘢。《華爾街日報》引述公司內部備忘，指利豐會失去Wal-mart國際嘅大部份生意。利豐上周五早上開con call否認，CEO樂裕民連續兩日上Bloomberg解畫，但利豐股價照插。市場信邊個？行動已經話晒畀大家聽。利豐今次又點樣施展佢嘅語言藝術？佢話，Wal-mart無收窄到採購範圍，係「集中」（focus）！我哋集中精力做某啲採購類別，唔浪費資源搞規模小嘅貨品，令經營更有效率，雙方有利，利潤更好，並唔代表定單同佣金會減㗎！如嗰朝未瞓醒，聽落係咪又好似好合理咁呢？從事傳統採購、買辦生意，喺利豐口中就叫「全球供應鏈管理」；為採購部門投資嘅「基建」（infrastructure），其實只係枱、電腦和電話；就連減派息，馮氏都要用「Ecosystem」去解釋咩叫資金自給自足，創作一個新英文字叫「dividendable」（海迪譯：可派息的），足足吹咗成10分鐘，令海迪諗起狼英。海迪