上周，因為撰寫在港生仔經歷，化名「穿甲龍天」的胡太顧燕清，以非港人身份，贏得《爽報》徵文比賽冠軍，文章刊登在特刊頭版，價值17萬元的名車袋袋平安。25歲的單非媽媽，原來是上海復旦大學社工系畢業生，曾在港大作交流生，因為一場陳奕迅演唱會，邂逅鄰座的港人丈夫，拍拖半年遠嫁香港。港男與名車雙收，難怪小妮子高呼：香港真係好！記者：呂麗嬋
產婦爭床位的新聞，觸動港人，大學時代已熱愛爬格子的顧燕清，一聽到「文字有價」，決心參加「賺奶粉錢」，「雙程證唔可以搵嘢做，寫五百字有架車，梗要試吓！」 操着不鹹不淡廣東話的顧燕清，還攤開剛在《明報》自由談刊登的文章給記者看：「登咗，但唔知有冇錢！」大學時最愛背包旅行，闖南走北，又爭取來港交流見識，積極進取的性格，不單讓她贏得名車，更讓她贏得一段異地姻緣！
演唱會邂逅港男
「3年前，陳奕迅喺上海開演唱會，我第一次去聽，坐喺我隔離個男仔講廣東話，我去過香港做交流生，大家傾起偈，我當時申請緊香港浸大研究院，想叫佢返香港時幫手問問，於是就交換咗電話。」研究院無下文，一段中港姻緣卻就此萌芽，之後雙方透過MSN聯絡，其間她又南下深圳工作。4月尾邂逅，10月已決定結婚。
住板間房無怨言
中港婚姻一直被指問題多多，不怕嗎？坐在一旁的胡先生搶着答：「如果唔結婚，佢就落唔到香港住，咁樣分隔兩地，好易散；婚後再深入了解都唔遲。」現年34歲的胡先生，任職金融界，之前曾派駐上海工作六、七年，「喺內地咁多年，邊啲內地女仔係結婚對象，點會唔知？我鍾意佢夠獨立，一個人喺深圳做嘢，住五百蚊嘅板間房，得張木板床，啲窗爛晒，半句怨言都無」。
對比嬌生慣養的港女，胡先生笑笑口說無得比。婚後，顧燕清以港人內地妻子身份，續期雙程證在港生活，三個月前以單非媽媽身份誕下兒子胡申龑（音：炎），「申，即係上海；龑，飛龍在天嘅意思！」正等候批出單程證的年輕媽媽，「坐完月」不久，百忙中仍不忘問：「希望早啲批出單程證，咁樣可以快啲搵工。講真，你哋報紙，有冇專欄可以畀我寫吓呢？」
真正字字千金半小時贏17萬
以筆名「穿甲龍天」，寫下五百字短文《因愛之名 生命無價》（原題：生仔也瘋狂），贏得名車，名符其實字字千金！顧燕清說，文章構思了一星期，真正執筆只花了約半小時。
公佈結果前一日，報館有人來電告知她已入圍，一舉成功：「喺香港生仔，有居港權，教育好啲，但無床位，好徬徨，好在老公嘅老闆幫忙，但喺養和生，埋單要十幾萬，我哋為咗個仔，之前賣咗架七人車，諗住鬆動啲，點知依家又因為佢，贏番部車！」 人生總是奇妙，十年河東十年河西，十年前，又怎想到今日大國崛起，港人變港燦，港女變剩女吖？