長腳蟹呂慧儀舊年12月同08年落選香港先生黃文迪（Dickson）結婚之後，工作雖然忙到冇停手，但佢一有時間就同老公拍拖煙靭。好似前日家庭日，呂慧儀同黃文迪兩公婆就約埋幾個朋友同小朋友去迪士尼樂園玩，見呂慧儀走嘅時候拖實朋友嘅小朋友，母愛洋溢，睇嚟佢真係好鍾意小朋友。
違例超載
呂慧儀同老公Dickson以及成班朋友前日喺迪士尼玩到下晝5點就走人，佢同老公一人拖住一個小朋友，好似一家人咁溫馨。呂慧儀仲邊行邊撩小朋友玩，又烏低身同佢哋傾偈，對小朋友好有耐性同愛心，反而Dickson唔知係咪好攰嘅關係，見佢全程冇乜表情。之後Dickson成班人坐上呂慧儀部七人車，由呂慧儀做司機，但六個人連同三個小朋友上車，好明顯係超載。後來呂慧儀揸車車咗成班人返自己天水圍屋企之後，就同另一個女性朋友買餸返屋企煮飯，真係溫馨。
採訪、攝影：李志明、徐錦池、黃曉程
