據德國傳媒報道，歐元區預備將永久的歐盟穩定機制（ESM）資本規模擴大至2萬億歐元以上，比原先構想激增4倍，基本上是一鋪晒冷，務求將歐債的風險溢價一次過大幅推低。一個QE3再加2萬億歐元救市基金，全球資金氾濫只會有增無減，商品及樓市出現恐慌升市，其來有因。
追落後遲早炒到
香港樓價已經咁貴，再去估市冇乜意思，但亦無必要故作驚人預測。翻查資料，本地某著名末日博士，年來一直睇淡股樓市，今年1月已說本港樓市已經見頂，未來至少要跌足3年；到5月時又稱港樓將步入熊市，跌幅達40%至50%，由於預測數字明確看似有根有據，業主、買家齊齊嚇死。估錯，不是罪，但請勿過猶不及，未來樓市不一定會大起大落。近日二三線地產股接連追落後，仍未見資金留意的宏安集團（1222）應快將炒到。近期永泰地產（369）的西半山加冕台呎價逾2萬元都幾乎沽清，宏安的西營盤薈臻亦主打細單位，96伙估計已售近60伙，套現近4億元，全數出售料可套回7億元，已經高於公司市值5.8億元。其他如深水埗及旺角項目規目同樣偏細（地盤面積僅4000呎），反而油塘四山街項目地盤面積4.1萬方呎，為集團特大Project，是日後盈利增長點。宏安去年推出的紅磡薈點估計已套回數億元資金，令公司負債比率跌至一成以下，但因以往頻頻集資令形象欠佳，故NAV折讓長期高企80%水平，只宜小注博炒到。歐陽風