facebook上市四個幾月、潛水近四成，為咗谷廣告，最近度到條橋，同數據公司Datalogix合作，追蹤用家睇完fb廣告後有冇買嘢，想用個結果做「孖屐亭」；有團體就批評，fb咁做係漠視用家私隱。雖然話呢單嘢暫時只係影響fb美國用戶，但大家都要留意發展，因為最終可能會殺到埋身。Datalogix買咗約7000萬個美國家庭資料，主要係千幾間商戶嘅積分卡會員，Datalogix追查佢哋嘅登記電郵地址，有冇同時喺fb註冊，有嘅話就睇吓佢哋有冇睇完fb廣告後去買嘢。暫時Datalogix為fb追蹤到45個推廣項目，發現商戶喺fb每花1美元，就帶來3美元收入，好似有啲效益。但美國一個保障網絡私隱嘅團體就批評fb只求賺錢，唔保障用家私隱，部份商戶對fb咁樣攞資料亦有保留。