富商林建岳同前妻謝玲玲所生嘅25歲三女林愛兒，近年喜愛作中性打扮，而且早年仲被影到佢同女性密友拖手行街同咀嘴。作風一向低調嘅愛兒，噚日現身觀塘裁判法院，原來佢喺8個月內因為違例駕駛被扣滿15分，由於係佢第二次被扣滿呢個分數，所以噚日法庭罰佢停牌6個月。點知佢呢頭踏出法院大樓，嗰頭又涉嫌違反交通規例坐車唔扣安全帶，真係教而不善。
掛住玩手機
愛兒舊年7月9日、11月11日同今年3月22日違例駕駛，分別被扣5分，佢噚日喺庭上承認被扣滿15分，但就冇向裁判官作出任何求情。散庭之後，愛兒本來諗住離開法院，點知佢一見有記者想影相，就即時閃身入番法院大樓，唔肯接受記者訪問，跟住仲急call私家車接佢離開。
有個男人喺現場為林愛兒護駕，佢為咗擺脫記者追訪，於是由法院二樓跑樓梯離開，然後急急閃身上私家車。點知佢上車之後又涉嫌犯規唔扣安全帶，然後一味耷低頭坐玩手機，至於佢司機就企圖衝紅燈，真係險象環生。
案件編號：KTD435/12