經濟不景，企業裁員，減少員工出差，或者唔坐商務艙見怪不怪，照咁睇，航空公司嘅商務艙需求可能受壓，國泰航空（293）就推出新商務艙吸客。
新增蘋果USB接口
國泰噚日公佈，未來兩年陸續為飛區內短途線嘅飛機換上新商務座位，都係加闊前後、左右、椅背調節幅度呢幾招，電視個mon同餐枱闊咗，仲有新嘅USB同蘋果產品連接口，唔使自備電掣都可以叉電，但唔知係咪支援用咗新插頭嘅iPhone 5呢？不過上網格價，短途航線商務艙貴經濟艙一倍到四倍都有，視乎地區而定，想坐得舒服始終要付出多啲代價。國泰呢幾年不斷改善硬件，換座椅，之前推特選經濟艙攻長途客，同樣係加闊座椅之類，再提供埋商務艙服務，想喺商務同經濟艙需求之間殺出血路，雖然暫時難言成敗，但求變總好過一成不變。