英聯盃第3圈開打，列強登場，收費電視不設直播，真嘥料！今輪重心撐喺聯賽未敗但未開齋嘅新特蘭，作客贏甲組嘅米爾頓凱恩斯，兩倍客W值博，破對手今屆主場不敗身。據知情人士透露，擁播映權嘅「現在台」稍後才會安排直播呢個盃仔，咁好嘅周中賽期有英國波，主理人棄之無厘頭！莊家對呢個盃仔，賽前亦陷迷茫，全部周二三英聯盃，喺軍情未充份掌握嘅情況下，暫全不設「讓球」盤，冇「吉士」？又未有得睇，賠率乏味強隊更冇重押嘅動機；重心先選今屆表現實而不華、但聯賽未勝嘅新特蘭；上一圈強陣主場贏乙組摩甘比2:0，聯賽鬥利物浦同阿仙奴未落下風，上仗臨尾香被韋斯咸逼和，今次相信嗰陣唔會太差，臨場見出射手史提芬費查可加注，但年輕箭頭域咸亦大派用場。對手米軍位列甲組前列，反會望佢哋心雄爭升班早早放棄盃仔了事。次選取韋根作客韋斯咸不敗，後者領隊艾拿迪斯從來不喜呢個盃仔，上仗主力拼盡聯賽逼和新特蘭，今次必大幅輪換，讓唔起韋根；冷選博明天雷丁，對同級季初一樣咁「水」嘅昆士柏流浪，4倍客W可試。（下次見報日期：29/09）文：蘋果波神