咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
《咖喱篇》早兩年，南華搵咗畢特同基士文嚟香港，但夾唔到隊波，之後南華引以為鑑，冇再簽過氣球星。今年英超嘅昆士柏流浪（QPR）諗住大展拳腳，亦搵咗班過氣球星返嚟，人工畀咗唔少，但表現唔成正比，家排緊尾2。QPR上季踢到最後一場，先至成功護級；今季都冇改善，頭5場聯賽未贏過，睇嚟又要喺護級漩渦掙扎。相比上年嘅升班馬史雲斯同諾域治，QPR嘅投資最多，而亦衰在投資太多，今季簽咗保辛華、施薩索拉斯同朴智星，加埋上季簽嘅施斯、胡禮菲臘斯同安頓費迪南，令隊波冇一個常規陣容；可能大家夾咗半季開始熟嗰陣，點知下季啲人又唔同晒，試問點會踢得好！另外，史雲斯就擺明行巴塞式足球，同你鬥地面，而諾域治就硬橋硬馬，同你打英式足球。相反，QPR今季仲借咗格尼路，佢哋想打中路入楔定雙翼齊飛、玩技術定係重體能？真係冇人知。早排睇咗篇評論講英超升班馬嘅生存之道，入面提到兩點，首先陣容唔好大變，最緊要班波夾慣夾熟；第2要有自己風格，因為實力有限，通常都會用簡單直接嘅踢法，防守就靠爛打，用體能彌補技術。史篤城同新特蘭都係靠呢套方法留到喺英超咁耐。我諗曉士要快啲為QPR定下一套風格，然後敢於棄用某啲大牌，否則曉士個領隊位都應該坐唔耐。文：咖喱