蘋果日報報道，連任議員涂謹申話要向選民致歉，致歉已經係minimum charge咁講，致甚麼歉？原來係為2010年民主黨支持政改方案喎。
一班中產選民老友睇到呢段新聞，為之撞火，聲言以後唔再投票俾涂謹申。左丁山問佢地點解咁㷫，律師H話：「見到占士猛咁告急，一泡眼淚咁款，馬主U又出短訊呼籲超級區議會選舉一定要投票俾民主派，於是我地朋友之間，自動配票，我話涂謹申係行家，又告急，就投佢一票啦。點知佢原來冇立場嘅，要投向激進派懷抱，如果係咁，我鍾意激進派嘅話，不如投俾黃毓民啦，黃毓民講嘢、辯論，醒過占士好多啫。」另一位財務C就講：「民主派嘅經濟政策全部係反市場嘅，搞社會主義，與陳婉嫻工聯會並無不同，唔啱我支笛，但我仍然投何俊仁一票，主要係希望立法會內有溫和民主派聲音，頂住啲左派與擲蕉分子，如果涂謹申與民主黨變成激進，我下次就會投白票咯。」
咁又係，我地一致認為，如要講激進，民主黨人冇資格，爛起上嚟，點都不及梁國雄、陳偉業與黃毓民，民主黨如不能堅持民主溫和理性派立場，以後勢必失去大量市民支持，下次選舉泡沫化。
上次講到中大學生走位上位，有老友質疑某啲大學生係唔係咁現實，政治取向竟然傾向民建聯呀！左丁山話世道如此，有乜辦法，唔係嘅話，做乜咁多大學生入學就申請輪候公屋等着數？左丁山奉行自由主義，A君如何選擇，有佢嘅自由，他人不宜干涉，他人當然亦有自由唔支持A君嘅選擇，唔俾A君一票。實務上，左丁山唔吸煙，不歡迎B君在左丁山身旁吸煙，但B君有吸煙自由，不便反對，理得佢是否傷害自己健康吖。一位中大生來電郵話，新科立法會議員之中最年輕一位32歲鄧家彪（工聯會），其實係中大新亞書院2001年社會系畢業生，曾經係中大划艇隊隊長，膽粗粗上書李國章校長要求撥款40萬元買新艇，竟然得到批准，划艇隊隊友視為奇蹟，聞說該艇仍沿用至今。唔，識划艇走位，果然醒目划咗去工聯會，一躍龍門成為立法會議員，容乜易以後有大把人跟風！