新鮮出爐嘅「胡潤百富榜十大」，出現騰訊（700）主席馬化騰呢個新面孔，佢以410億（人民幣．下同）身家，成為中國富豪第七位。呢隻藍籌股王，今年累升63%，令唔少人大跌眼鏡，股價咁勁抽，馬化騰實發過豬頭啦，難怪以地產起家嘅吳亞軍同許家印，都要俾佢騎住。擁有龍湖地產（960）嘅吳亞軍家族，以380億身家排第八位，比舊年跌一級，但就依然保住女富豪寶座。恒大地產（3333）主席許家印，以350億排第九，大跌四級。當年恒大來港上市，許家印嗌得郁新世界（017）創辦人彤叔同華置（127）主席劉鑾雄做人肉佈景板，可見佢哋交情匪淺。近排彤叔入院，大劉又官司纏身，唔知許家印會唔會來港探吓佢哋呢？至於娃哈哈創辦人宗慶后就繼2010年再次做首富，800億身家喎，心情應該都「嘩哈哈」啦。