好快又到十一黃金周，強國人民將會再一次逼爆香港，同一時間，本地零售股有望借長假期炒番轉，當中化妝龍頭股莎莎國際（178）噚日逆市破位，相信已有聰明錢率先入場，值得憧憬。莎莎最新公佈嘅銷售數字顯示，7月至8月19日期間，銷售按年仍然有逾兩成增長，以行業龍頭嚟講，升幅算係非常可觀，比起首季（截至6月底止）表現更標青。難怪數字公佈後，股價可以Keep住喺今年高位徘徊。根據彭博綜合券商預測，莎莎今年預測市盈率18倍唔夠，息率更接近4厘，估值尚算吸引，嚟緊黃金周長假期，平時已經人山人海嘅門市，生意只會有增無減。睇圖表，莎莎噚日逆市抽升2%，收報5.18元，以陽燭突破之前嘅小雙頂，10日線亦已升穿20日線，形成黃金交叉利好走勢，後市可看高一線。現價買入，短炒博見5.70元，潛在升幅一成。唐牛