恭喜、恭喜，殘奧雙喜臨門！今個月喺倫敦殘奧會奪得3金3銀6銅嘅香港代表隊，噚日獲贊助商頒發20萬港元獎金獎品；更開心係，被殘奧「兩金公主」余翠怡踢爆嘅一對輪椅劍擊小情侶，譚湜琛同陳蕊莊就嚟拉埋天窗，下一屆準備以夫妻檔參賽咁話。
25歲嘅譚湜琛，05年突然患上血管瘤，原本玩跳遠嘅佢，突然下半身癱瘓要坐輪椅，但佢冇灰心，學咗輪椅劍擊7年，終於喺今屆贏男子個人重劍銀牌。噚日獲贊助商頒發3,000蚊現金獎同7,000蚊金飾禮券，問佢會唔會用嚟買結婚戒指，佢話：「越快越好啦！不過家讀緊IVE，等生活穩定啲先結婚就最好。」
另外，蘇樺偉噚日喺同一個場合客串銷售員，吸引唔少師奶粉絲買「香港殘奧會40周年」八達通紀念卡，籌到款項全數畀運動員備戰2016殘奧會用。