今年TGS雖然PS獨大，但Game廠方面依然鬥得燦爛。其中《芒亨4》熱爆場館，攤位外堆滿機迷，吸引力認真夠勁！而其他Game廠亦擺出自家名作迎戰，雖然唔少都係續作食老本，但都總算鬥得精采。 記者、攝影：韓繼聰
CAPCOM八大區夠心思
為爭人氣各Game廠出奇謀，當中CAPCOM可算最用心，將攤位分成八大展區，每個試玩區都對應試玩遊戲佈置出獨特佈景。王牌作《芒亨4》試玩版首次曝光，當然隆重其事，佔攤位最大最當眼位置，一隻巨獸壓頂加埋野外佈置亦見氣勢。試玩區內有N3DS及N3DS LL試玩，但N3DS LL的追加專用掣就只有得睇無得玩。遊戲方面，或因遊戲仍在開發階段，感覺上畫面唔算有太大提升，但動作性感覺更強，玩家亦可試用今集的全新武器，難怪Keep住有超多人等玩。另一勁作《Bio 6》則非常惡搞，試玩區門外佈置成豬肉檔，更大大隻字寫住「肥茜肉食公司」，對我呢啲香港記者嚟講真係相當搶眼！試玩亦無交行貨，有全新Ada 於香港背景進行任務的部份。另外如《逆轉裁判5》亦把試玩區變成法庭，相當抵死。
《MG》推手機版 Wii U靜英英
雖說TGS中各廠商都主力發佈或試玩「新」Games，但大部份係續作，靠老本撐場。SEGA就以《人中之龍5》作重點，佔攤位大部份，人流亦相當多，玩家可試玩今集新加的絕技系統，繼續享受爽快的「爛仔」格鬥。KONAMI唔使講當然以《Metal Gear》迎戰，除極受期待的《MGR》，亦大搞《MG》 25周年，及加推手機版《MG》。而KOEI則繼續其「無限」無雙，以《真．北斗無雙》擔旗，追加大量角色及遊戲篇章，但因玩法大同小異，現場反應一般。
另外，即將登場的Wii U喺TGS可謂出奇的冷清，未見有廠商展示專用遊戲。最勁聲勢都算係《勇者鬥惡龍10》 Wii U版，但都只係齋睇。BANDAI則有幾部機提供試玩《鐵拳TT2 Wii U Edition》，玩家可試用大隻版孖寶兄弟，一嘗在戰鬥中被變大縮小的滋味，現場玩家都玩得興奮，兼大讚有新意。
