《答案：皆不是》
有啲人顛倒眾生，吹灰不費，即使化咗灰，都會俾人認得出。好似禿鷹曾偉雄咁吖，佢極具個人特色嘅立立令地中海、烱烱有神嘅雙眼，同埋一張死不認錯嘅鐵嘴，令人一見難忘。
有「眼利」嘅市民同八方報料話，禿鷹可能驚自己太唔受歡迎，遲早會被轟落台，所以鋪定好路轉戰娛樂圈，日前去咗面試選亞洲先生；有網民將佢同《國產零零漆》由星爺飾演嘅豬肉佬相比，話佢就算除咗眼鏡去選港男，一樣俾人認得出，因為佢「好似漆黑中嘅螢火蟲一樣，咁鮮明、咁出眾咁話。」
吳華星紅爆網絡
八方都知道，如果禿鷹唔撈，好多市民都會「熱烈地彈琴、熱烈地唱」，好似慶祝劉江華落選咁開香檳搞party；可惜，現實往往係殘酷嘅。睇真啲，呢位冇戴眼鏡嘅吳華星先生，較禿鷹少咗啲戾氣、但又多咗分憨味，睇睇吓，查實仲似教育局局長吳克儉㖭呀。
雖然佢入圍機會微乎其微，但呢位禿鷹同儉儉嘅混合體，已經瞬間紅爆網絡，未選先贏一仗。他日禿鷹同儉儉若然要搵替身出席諮詢會，以免畀市民掟，不妨向佢招手。