蛇齋餅糭，係唔少政黨向公公婆婆打招呼嘅恩物，但今年各大政黨只要參加咗立法會選舉，都會少咗一條來自煤氣公司嘅「月餅大水喉」，因為煤氣公司為咗避嫌，選舉前後都停咗透過參選議員送月餅呢條米路。中秋臨近，唔少選區都竟然鬧「月餅荒」。以往煤氣公司都會透過區議員、立法會議員呢個強大網絡，向地區長者送贈糭子、月餅嚟應吓節。聽聞按慣例，區議員最多可獲派300個、立法會議員可獲派1,000個月餅轉贈市民。嚟緊星期日就係中秋節，唔少公公婆婆都引頸以待政黨「派餅」。
街坊唔要大陸貨
但煤氣公司為免被指有賄選或延後利益之嫌，今年暫停向參選名單內所有人派餅。咁搞法，對啲地區樁腳打擊最大。好似今年喺新西李永達名單排第二嘅民主黨林立志咁，佢話以往煤氣公司出手闊綽，奇華、聖安娜等名牌都有，今年冇咗呢條大水喉，都幾頭痕。林立志話，建制派財雄勢大，自掏腰包買咩餅都可以；但係民主黨今年新界西慘敗，惟有要自己諗吓計，幸得有酒店相助，先可以繼續派餅。有地區人士話，街坊對月餅嘅要求好高㗎，首先一定唔可以入大陸貨；如果諗住平平哋買啲冇蛋黃嘅，又怕會俾人寸「咁似棋子餅」，真係「巧婦難為無餅炊」。不過，街工梁耀忠就話煤氣公司月餅供應始終有限，有街坊會攞唔到，所以為咗唔令攞唔到月餅嘅街坊失望，咁多年嚟佢都寧願唔派月餅。街忠就話搞個人魅力啫，但佢徒弟黃潤達又點算好呢？參加新界東選舉嘅新民主同盟任啟邦就話，今年惟有印吓工作報告嚟「應節」。mailto:[email protected]