F1新加坡站周日喺連番意外下完成，紅牛嘅維特爾繼上年後，再度揚威濱海灣賽道，取得個人今季第2場勝利；車手榜領先嘅艾朗素今站第3，不過就被維特爾力追。
以頭位出賽嘅咸姆頓，起步順利帶出，不過第2位出戰嘅威廉斯車手馬杜拿杜，首圈已被維特爾同畢頓越過；咸姆頓外號「黑帝」，不過今次新加坡夜賽就變成黑仔，戰至第22圈，竟然因為波箱故障而退賽，正同麥拿侖傾緊續約嘅黑帝，當然冇晒心機，仲怒拍軚盤發洩。維特爾冷手執個熱煎堆，升上第1位。
舒密加炒車夠友誼
之後出現連番意外，先有伊斯巴車隊嘅卡菲基恩因撞車退賽，之後到平治嘅「車神」舒密加，收掣不及撞到紅牛二隊維尼個車尾，雙雙退賽，維尼落車後更步向舒密加，不過原來都只係伸出友誼之手；因為意外要兩度出動安全車，雖然令維特爾嘅領先優勢縮減，不過由街道改裝而成嘅濱海灣賽道，要超車真係好難。維特爾順利率先衝過終點，成功衞冕，亦係佢繼巴林站後今季第2度封王；麥拿侖嘅畢頓同法拉利嘅艾朗素分列2、3。由於原本排車手榜第2位嘅黑帝冇分，艾朗素攞10分後仍然喺車手榜領先，不過就畀維特爾拉近至29分差距。
場內鬥得燦爛，場外靚女都爭妍鬥麗；新加坡賽會派出熱力四射嘅賽車女郎，不過都敵唔過畢頓嘅日籍模特兒女友道端，一套藍色半截裙搶鏡非常。另外中國車手馬青驊，雖然上周五代表伊斯巴車隊出戰首天試車，不過到排位賽同正式比賽就冇佢份；佢上周六晚就聯同伊斯巴另一車手哥沙，齊齊出席慈善時裝show，同一班靚女模特兒行貓步。