【台灣高雄】釣魚台主權爭議令中日關係好緊張，「日劇女王」松琼菜菜子上周三好低調去咗台灣高雄，拍三池崇史執導嘅新劇《蒿之楯》，同日劇《仁醫》男主角大澤隆夫、電影《死亡筆記》男星藤原龍也合作。
大澤隆夫耍大牌
據知，菜菜子身為日劇最高片酬女王，每集片酬有約25萬港元，而佢入住當地五星級寒軒國際大飯店嘅總統套房，一晚房租要8.8萬新台幣（約2.3萬港元），絕對襯得起菜菜子嘅女王地位。
噚日中午12點半，藤原龍也喺保安護駕下現身，菜菜子同大澤隆夫就着警員戲服出現，剪咗一頭短髮嘅菜菜子着白衫黑褲型格十足，大澤戴住一頂有佢名嘅帽。菜菜子好有禮貌咁同記者揮手，不過笑容有啲生硬，至於坐佢隔籬嘅大澤隆夫就攞證件同個袋遮面，仲大牌過菜菜子。
大隊去咗高雄左營基地取景，有粉絲山長水遠曬住等偶像，仲有記者同片廠保安鬧交，好在冇影響拍攝。38歲嘅菜菜子喺新劇同大澤隆夫扮刑警，奉命移送藤原龍也飾演嘅殺人犯受審，佢哋喺高雄嘅劇份差唔多拍完，之後會去台南取景，星期五（28號）會返日本。撰文：葉雪
