蕭定一6月榮升老竇，老婆Michelle生咗小龍女蕭熵芷（Souleah），前晚仲喺海洋公園內嘅水族館餐廳搞百日宴，蕭定一同魔術師用氣球表演吞劍，張智霖（Chilam）、傅明憲、趙碩之、石詠莉、莊思敏、寇鴻萍夫婦、導演葉念琛、無綫高層樂易玲、施念慈、陳浩民太太蔣麗莎仲帶埋囡囡雅薷撐場。
樂易玲仔爭錫腳底
Michelle同囡囡Souleah着紫色母女裝襯到絕，Souleah連同爺爺蕭若元及太嫲，正好四代同堂，高高興興。百日大嘅女主角Souleah中段已覺覺豬，懶理賓客high爆狂歡，就連爸媽推佢出去切蛋糕，已經好夢正酣，樂易玲囝囝都忍唔住，好肉緊咁錫錫小B女腳板底。
Chilam單拖到場，眾賓客爭住同佢影「集郵相」，就連趙碩之都唔放過呢個帥哥。Chilam坐咗一陣就離開，仲拎咗個用氣球扭成嘅蜘蛛俠公仔返屋企，佢話：「送畀我個仔。」廿四孝老竇認真唔話得。
此外，前晚咁啱係在場嘅寇鴻萍同老公梁廷鏘結婚九周年，雖然蕭定一同傅明憲幫手起哄要佢哋即興嘴對嘴晒恩愛，但梁廷鏘點都唔肯，連錫老婆面都抗拒，寇鴻萍即詐型：「結婚九個月就會，九年冇呢支歌仔。」
