【都是那些年】踏入女人四十的湯寶如，離開樂壇14年之後勇敢回歸，更向高難度挑戰，踏上紅館開騷，但壓力大到要每晚食安眠藥入睡；在事業上重新出發的她，在感情上亦將邁向新一天，計劃明年跟拍拖8年的男友結婚，不過，當年湯記未發現懷孕前曾想分手，甚至因有恐懼症想過唔要BB：「家諗番都好衰！」撰文：余燕儀
當年跟黎瑞恩、劉小慧合稱寶麗金小花的湯寶如，代表作有與張學友合唱的《相思風雨中》、《緣份的天空》、《感冒》等，於98年推出最後一張精選碟後，湯記即在樂壇銷聲匿跡，她說：「寶麗金轉咗畀環球之後，我返內地搵錢，冇再簽任何唱片公司，嗰時唱片業低潮，冇乜人買唱片，加上又金融風暴，市道冇以前咁興旺，個個返內地做嘢，我喺上面拍咗好多劇集，仲有啲7日鮮電影，成日撞到家英哥（羅家英）。」
內地搵銀維生
90年代出道的湯記，慶幸自己出道時間好：「我都算好運，嗰時內地啱啱開放，啲人可以聽廣東歌，家返內地登台，有啲fans得20歲，佢哋話讀書已經聽我啲歌，估唔到自己可以吸納8、90後fans，我諗呢啲係緣份，反而香港呢代係聽緊吳雨霏、王菀之。」雖然當年要離鄉別井，但湯記不覺得辛酸：「我唔會長期住，冇我戲份就返嚟，我覺得好自由，冇香港做嘢咁趕㖭。」問在內地賺了幾桶金？她笑說：「唔係好多，起碼衣食住行應付到。」離開了香港樂壇這段日子，湯記在事業上重新出發，感情上亦跟前度的梁漢文、音樂人譚國政撇清關係，並認識了搞賽車的男友Sam Chan，他比湯記大一年，兩人經朋友介紹認識，她說：「佢畀我好大自由度，同行拍拖反而多拗撬，唔好話梁漢文，就算譚國政都一樣，以前冇凌晨4、5點唔瞓覺，好多幕前幕後人上嚟打牌，家我冇掂麻雀3、4年，去街最好夜晚11點前返屋企，否則有罪惡感，成個生活唔同咗，或者人有唔同階段，到40歲要有責任感。」
無悔未婚生子
湯記與男友雖然有個5歲兒子，但兩人仍未註冊，當年為甚麼有勇氣未婚生子？湯記笑說：「其實嗰時自己想分手，我哋拍咗2年拖，覺得好悶，但突然有咗，嗰時考慮要唔要，家諗番都好衰，因為我有恐懼症，怕生咗冇工作能力，我唔鍾意完全靠男人，湊仔起碼停兩、三年工作，咁點算呢？但嗰時自己37歲，唔要唔得，所以決定生，呢樣係天畀你，我同佢講有咗但唔結婚，佢話：『我都唔想結喎。』咁good啦，大家有共識，生咗出嚟覺得BB好得意，仲改變咗我嘅人生，家乜都以囝囝為重，我冇後悔生佢出嚟。」做了媽咪的湯記，心態亦改變，計劃明年跟男友結婚，她說：「以前唔結婚係唔鍾意束縛，可以話自己係單身媽咪，識第二個男人冇權話我，我未結婚有權選擇，但簽咗紙就好麻煩，要孭責任；家決定結婚唔係話要名份，不過看更、學校都會叫我陳太，囝囝有次問我：『媽咪，係咪要結咗婚先生仔？』我想畀囝囝見證吓乜嘢叫結婚。」
唔會請梁漢文
為紀念入行20周年，湯記將於12月22日踏紅館開處女騷，她說：「好多人估唔到湯寶如開演唱會，我唔會諗啲飛賣成點，努力做好自己，排舞、減肥，我家120磅，想再減10磅，我乜都想親力親為，壓力真係好大，每晚要搵朋友傾偈減壓，仲要食安眠藥先瞓到。」湯記多謝寶麗金一班歌手支持，如草蜢、劉小慧、鄭中基都恭喜她，黎瑞恩還第一個說要做嘉賓，至於舊愛梁漢文，湯記說：「一定唔搵梁漢文，大家唔好因為佢買飛，我哋冇聯絡，但唔係仇人，大家有各自屋企，無謂搞咁多嘢。」