亞洲點止得日本勁，「太極虎」南韓球員發圍嘞！上周六晚，朴主永同孫弘民都有入波，各自幫球會贏波，其中由阿仙奴借用到切爾達嘅朴主永最威，成為西甲史上首個入波嘅南韓人。
朴主永西甲入波創先河
舊年由摩納哥轉投阿仙奴，朴主永以為自己係雷霆救兵，點知坐冷板坐到結冰。今季兵工廠仲要買前鋒，擺明唔用佢，所以朴主永決定去西甲轉個運，外借到升班馬切爾達。上周六晚主場對基達菲嘅聯賽，朴主永喺66分鐘後備登場，係佢首次幫切爾達喺主場比賽。佢入場嗰陣，兩隊仲打成1:1平手，但入咗嚟兩分鐘多啲，第2次掂波，佢就幫球隊奠定勝局！喺69分鐘，丹麥前鋒高恩迪利喺左路傳中，個波彎過守衞，遠柱嘅朴主永衝前將個波入網，反應同把握力一流！呢個入波唔單止幫切爾達贏2:1，取得主場兩連勝，仲係南韓足球史上嘅最要一頁，因為朴主永係第一個喺西甲入波嘅南韓人。賽後，教練柏高靴利拿讚口不絕：「今場全隊都表現得好好，係一場偉大嘅比賽，朴主永同高恩迪利更加貢獻良多。」
孫弘民兩粒搞掂多蒙特
至於喺德甲搵食嘅孫弘民都不讓朴主永專美，佢喺上周六聯賽梅開二度，一頭一腳，射死上季冠軍多蒙特，幫漢堡主場以3:2擊敗對手，打開今季勝利之門，仲終止埋「蜜蜂軍團」跨季31場聯賽不敗嘅紀錄！孫弘民嘅兩個入波都相當精采，開波兩分鐘，佢接應雲達華治嘅傳中，頭槌頂入，幫漢堡先開紀錄。去到下半場59分鐘，佢仲有個個人表現機會，喺後半場截到對手嘅傳波，之後一個人帶到去禁區頂，右腳遠射網仔入；多蒙特門將維丹費拿都企咗喺度，冇得救呀！英超方面嘅南韓兵就稍為失色，雖然寄誠庸上周六首次為史雲斯聯賽正選，但佢冇咩表現，隊波仲喺主場吞咗愛華頓3隻光蛋。反而，修咸頓嘅日本後衞吉田麻也同樣首次正選，但球隊就順風順水，反勝阿士東維拉4:1。