財政司長曾俊華自從失去煲呔呢座靠山之後被打入冷宮。以往鬍鬚曾負責公佈壓抑樓價、土地房屋供應、額外印花稅呢啲重要政策，但家吓好似已經唔再關佢事，頻頻被放逐離港。早排去完俄羅斯，下星期就被派去台灣開會。鬍鬚曾嘅網誌，就係佢嘅失寵記，佢以往會講吓社會民生問題，但家吓就講吓自己請咗咩實習生、外訪見聞、睇咗咩戲咁。佢上月頭寫過一篇《穩定住宅土地供應（一）》，但就冇再寫第二集。查實呢招「架空官員」以前煲呔都玩唔少，好似狼振英以前只係得個城大校董會話事，唐英年就負責搞古樹，好嘢就留番晒畀曾俊華，呢啲咪叫做一朝天子一朝臣囉。