社運女神、前學聯秘書長周澄近月正式加盟擅長報道中國時政敏感話題嘅中文電子雜誌《陽光時務》，噚日佢就現身香港記者協會搞嘅遊行，暫時放下社運分子嘅身份，換上記者角色，採訪呢次抗議內地當局打壓本港傳媒北上採訪嘅集會。周澄佢一身黑色連身裙兼長靴，可見佢同樣支持記協嘅黑衣抗議。曾經喺內地採訪譚作人案、畀公安老屈藏毒嘅now新聞台前記者黃嘉瑜雖然過檔醫管局，但亦都有嚟參加遊行撐記者，相當有心。周澄所屬嘅《陽光時務》將喺10月中旬改版，由雙周刊改為周刊，除咗家網上同iPad有得睇之外，下個月15日仲會出埋雜誌版，聽講要賣30蚊，唔知會唔會殺出條血路呢。