國泰航空訂出咗一次大規模裁員計劃，但今次保證唔會好似以前咁爆發工潮。因為要裁嘅唔係人，係飛機。國泰為咗節省開支，將747-400機隊21架客機全部強迫退役，首兩架今個月就要離場，五年內就全部消失。佢哋唔係唔飛得，或者太老，只不過佢哋係飛長途為主的大型客機，載客超過350人，但係長途線幫唔到公司賺錢，兼維修費貴，於是俾國泰淘汰。國泰話家航空市場市道太差，將佢哋賣或租出去都唔易，最後決定是幫佢哋做「器官捐贈」，拆晒啲有用嘅部件出嚟，做其他客機後備零件，包括引擎、起落架、飛行駕駛系統、座椅等，747-400型號機隊嘅殘餘生命咁仲可以延續落去。