最驚險：修咸頓
球迷好現實，亦最識馬後炮，修咸頓大炒維拉四個一皮後，球迷喺聖瑪莉球場內唱"There's only one Nigel Adkins".（這裏只有一個艾堅斯）。事實上這位外形同進攻風格頗似雲格嘅修咸頓領隊，賽前都話唔驚被炒，但球會新埋班，對維拉嘅上半場，處於下風，射中門框只有一次，誤傳頻生；逆轉勝嘅關鍵主要係對手中場命脈艾利蘭半場傷出，令雜牌軍嘅維拉當堂被勝在團結、兩閘豁出去進攻嘅修頓連陷4城。修咸頓前景唔錯，不過億萬貴貨加斯頓拉美利斯中場發辦，令隊長拉爾拉拿打左中場，兩大希望之星磨合有待；下場聯賽作客極勇嘅愛華頓，部份守將未熟未夠班，驚入埋唔夠失，不過點都好，踢波場場計，英超開齋減壓，你爽我爽！
最奇異：伯明翰
上個禮拜六有兩場波嘅賽果極奇異，先講英冠，彼德堡反底不成又冇波入，開季7連敗，放棄了；但最神奇係今屆只能透過文字直播恨得牙癢癢嘅英冠，禮拜六尾場，呢次由賠率熱透嘅伯明翰迎班士利。小弟上次講過，伯明翰賣盤甚囂塵上，球隊士氣同爭升班決心遜於上季，今季睇淡，但佢哋上周中仍能氣走強敵保頓，大家戒心少了；估唔到衰喺最弱作客隊班士利腳下，喺下半場19分鐘內，被對手寂寂無聞嘅格力戴維斯連陷4球，淨吞5蛋。小弟強調，作客輸波有時好正常，主場大敗可能內部出了佢知你唔知嘅問題；加上財政狀況一般，下年1月賣走埋奧運龍門畢蘭特，死得！
最爆：大阪飛腳
同伯明翰一樣，小弟重點日聯球隊浦和紅鑽，喺連勝兩場後獲利回吐，主場慘負護級嘅大阪飛腳5蛋；唔同伯明翰，少爺波嘅紅鑽向來俾人詬病唔識打逆境波，班波一定高質，向來賴以穩建防守，喺下半場傾巢而出求平反敗局下大敗當抹咗佢；不過排喺佢哋前面嘅兩隊，三箭同維加泰就鬥心十足，同樣喺補時反勝對手2:1。聯賽仲有8周，輸一場唔係世界末日，不過大阪飛腳齋睇今場好厲害；下場迎戰另一隊褪色嘅鹿角，受讓可追一次寶尾，為盡快逃離降班漩渦，鬥心不遜爭霸者。
「主勝」先生：銀河
假日晨早起身想賭波，近期甜心未必喺有尼馬穩贏，冇佢必輸嘅山度士；反而最王道係季尾發力嘅美職聯洛杉磯銀河（白衫）。加入瑞典前國腳韋希姆臣，另一射手艾臣布度又復出，喺美職真係超班；噚日朝主場鬥FC多倫多，又炒4:2，總計已經連續5場開出咁啱都係淨贏兩球嘅「主勝」，碧咸冇踢一樣夠殺，好玩過成日開[-2]玩殘熱門客嘅巴塞隆拿啦！