新加坡站上周六排位賽，果然係今次故事主人翁咸姆頓嘅天下，佢以1分46秒362奪得桿位；而將會喺今日排喺咸仔後面出賽嘅，係威廉士嘅馬杜拿度，同排第3嘅紅牛德國「車神」維特爾。（now670台今日7:45pm直播）
上周六排位賽之前，最大新聞都應該係新加坡同意跟F1賽會續約，繼續舉辦呢項車壇盛事到2017年。講番排位賽，個天都算係咁，見上周五落雨落得咁甘，上周六晚就好好天。「黑帝」可能因為聽到韋馬殊話要佢減薪，所以用表現證明自己，Q2之後連續2節，都以最快嘅成績緊守第1，後面班車手食晒塵。贏到呢個桿位真係好重要，因為新加坡呢啲街道賽，路窄彎多，好易就會撞車；咸仔排頭位就着數得多，要贏真係唔難。