【周日人物】
走過長長的「綠葉」大道，黎耀祥09年演出電視劇《巾幗梟雄》中柴九一角，發自肺腑般地悲呼「人生有幾多個十年」，令逾百萬觀眾身同感受，祥仔自此迎來人生最大的轉捩點。登上視帝一線寶座後逾兩年間，祥仔吸金威力竟多過此前廿五載當配角的收入總和。他概嘆﹕「當有市場價值嘅時候，值錢到你唔信！」
得到這份等同中金多寶的運氣，黎耀祥接受本報專訪時說，「就係需要遇上呢個角色，咁嘅製作，一班觀眾去吹捧，集合咁多因素而造就今日嘅黎耀祥，呢樣係萬中無一嘅運氣，係唔會預計到嘅……（做綠葉的過程）好多戲（大家）都讚我做得好，但都冇柴九效應。」
把握機會 同家人勤接job
攀上高峰後，他未雨綢繆，甚至帶同太太、兒子密密接工作。有報道詳細羅列黎家三口近兩年有數千萬元收入。祥仔雖笑說報道「信唔過」，但承認確實多過此前25年的收入總和。
祥仔收入豐厚是近年的事，但當年曾在投資市場經歷慘痛教訓。他在股票投資上正分演天使和魔鬼這對衝突的角色，他自爆有愛賭的基因，但卻在股海浮沉多年後選擇止步抽離，斥責金融市場是騙局。
黎耀祥在中學年代已接觸股票，遇上八三股災後，全部交了學費。而損手最慘重一次要數千禧年科網股爆破，他投入的過百萬元幾乎化為烏有。多年來贏少輸多，但他未有死心。「嗰陣巧合識到一個內地有勢力人士，佢收到料話要買入中航科工（2357）……我兩個幾買入一批貨，其後遇到08年金融海嘯，跌落4毫再掃入，當時真係想瞓身落去，但當升到8毫，老婆就有顧慮嘞，唔可以淨係顧住我玩，結果沽清後拉勻蝕少少。」
多個大跌市 都炒燶股
被問到是否一直未能摸透這個遊戲的機制，他思考良久，否認此說法﹕「我好有信心贏番，只要夠定力。一生人只玩兩三次，吼大冧市嗰陣買入長揸，等待直至贏錢周期出現。」但他始終輸給心理戰，「買咗就想贏，一贏就會計較得失，所謂止賺、止蝕位，我哋永遠捉唔穩……唔想勞心勞力，所以我唔會買股票嘞。」
祥仔過去經歷多個大跌市中都有沾手股票，對股市充滿「不玩又玩」的矛盾心理。他承認，「一日參與咗呢個遊戲，就有呢個因子喺裏面，即一日輸過錢，就想贏番……落賭場有賭錢嘅樂趣，以前我都有去，但唔係一個賭性強嘅人。」他形容父親生前在七三年股災輸得好慘，但黎母經常教育自己知足常樂。「除非港股跌到萬二點，封咗蝕本門」，才能誘使他入市。
投資轉穩陣「唔博喇」
基於此及有意換大屋，他現在只會做穩健的簡單投資，包括定期存款和月供投資相連的長年期儲蓄保單，賺到的大筆人仔亦只在內地做定期，「唔博喇，喺可能用到錢嗰陣唔想綁住」。祥仔亦抗拒將資產交給銀行投資顧問打理，堅信中產無懼通脹，「我將大嚿錢擺喺銀行不斷貶值，係好戇居啊……但呢個世界好多雷曼，好似仔嗰陣幾間銀行執笠擠提。
佢哋sell嗰套抗通脹理論，大口氣講，對我根本冇影響，若有足夠錢去投資，雞蛋加兩毫，豬肉加十蚊，我都唔會冇飯開。」
黎耀祥（祥仔） 從影之路
年齡：48歲
．太太兼經理人梁耀蓮（Julia），育有14歲兒子黎正橋
【背景】
．黎父生前為消防員，童年在消防宿舍及200餘呎公屋單位成長，有三兄一姊
．從影26年，演出超過一百部電影及電視劇
【1983年】中六畢業後任職無綫電視（TVB）營業部文員
【1985】年報讀TVB附屬公司短期演藝課程，獲導師李添勝推薦加入TVB藝員訓練班，走上「綠葉」大道
【1996】年在《西遊記》中飾演豬八戒一角冒起，為觀眾所熟悉
【1998至2002年】離開TVB轉戰電影圈，及後過檔亞洲電視（ATV），但發展不如理想，再重返TVB
【2008年】憑《秀才愛上兵》分演兩角戴從文和戴從武奪得「最佳男配角」獎
【2009至2010年】分別憑《巾幗梟雄》和續集《巾幗梟雄之義海豪情》扮演柴九和劉醒，成為首位連續兩年奪得「最佳男主角」的視帝；柴九一角同時獲頒紐約國際電影電視節「最佳角色演繹優異獎」
【2010年】出書《戲劇浮生：黎耀祥論演技與人生》
黎耀祥三次換樓紀錄
【牛池灣威豪花園（500呎）蝕60萬元】
購入：260萬元（1996年）
賣出：約200萬元（1997年）
【廣播道星輝豪庭（1600呎）賺32萬元】
購入：708萬元（2001年）
賣出：740萬元（2007年）
【深井碧堤半島（1200呎）賬面賺340萬元】
購入：557萬元（2007年）
持有：市值約900萬元
股票買賣戰績平平
【1983至1989年】與同學夾錢約兩萬元買入當年李明治系聯合地產等股票，89年熊市後全部虧蝕，其中一隻快餐股由幾蚊跌至幾毫，股價僅餘十分之一。
【2000年】斥資過百萬元買科技股東方魅力（198，現稱星美國際）及錦興集團（275），科網股爆破後虧損達百萬元，是損手最慘重的一次。
【2001年】在18元買入電訊盈科（008），股價升至高位30元後跌至16元時沽出，虧蝕數個百分點。
【2008年】趁工行（1398）跌至約兩元買入，升了幾毫便沽出，賺逾三成；中航科工（2357）約兩元買入，其後跌至4毫溝貨，再回升至8毫沽清，拉勻蝕少少。
資料來源：蘋果資料室