對本地嘅少數族裔朋友仔一直有偏見，Sorry，係偏好先啱，都係多得細個時喺球場嘅經歷。經歷一係喺九龍公園跟隊鬥波，喺場邊等到發霉，終於有得出場，遇着唔知連贏幾多場嘅印巴藉對手，中場開波佢哋一個推橫一個勁抽，咁就中咗我哋條橫楣，差啲我哋一個都未掂過個波就出返去坐，當時心諗：「啲外援真好波！」下一場係若干年後，班波友為免坐場邊睇人踢，book咗佐敦街市隔離個場。「book咗場呀！」有人大聲一喝下，成場尼泊爾波友乖乖四散，其中一個好有禮貌咁問：「唔該，請問你哋book到幾點呢？」「book到今晚熄燈呀！」友人好鬼惡死！「啊，唔該！」之後兩個鐘，班南亞朋友喺場邊齋睇都自得其樂，一啲都冇比我哋嘅低水平球技影響心情。對少數族裔印象良好，但一直冇乜機會作進一步認識，直到幾年前喺無家者隊波識咗阿Jeff，佢好與眾不同㗎，皮膚黑、腳法好，仲好有禮貌，同我細細個嘅睇法一模一樣。為咗證明我嘅偏好唔係膚淺，我決定要了解佢多啲，多得無家者想出書，就畀我申請到其中一個作者位，仲mark埋同阿Jeff做訪問㖭，於是我終於第一次殺上重慶大廈搵佢。又唔好誤會，阿Jeff並唔係喺重慶大廈住，係喺入邊嘅社區中心上班，工作係協助因不同苦況而留港嘅政治難民，一上到中心好易就搵到阿Jeff，皆因各色人等都圍住佢氹氹轉，帶活動、傾心事、約社工、攞奶粉樣樣皆能，加上中英皆talk得，好笑容又斯文，直頭係一表人材，咁搞乜曾經要瞓街呢？阿Jeff話我知一個典型少數族裔嘅成長故事。明明喺香港地長大，人哋就當佢係外國人；明明講流利廣東話，但就一啲都唔識睇中文；明明鍾意踢足球，但鄉里主流係板球……加加埋埋，阿Jeff焗住乜都係異類，一到中學畢業就接受唔到殘酷現實，於是就群埋損友流連街頭，蝦蝦霸霸，直到犯事之後先知死。多得有心人同無家者，令佢慢慢搵返條啱行嘅路。家陣阿Jeff日頭做嘢夜晚讀書，仲分身踢緊5隊波，充實到呢！其中一隊係阿Jeff自己搞嘅政治難民隊，隊波嘅國籍之多拍得住車仔同阿仙奴，「咁點溝通呢？」「唓，踢波邊使講嘢㗎！」係，隔膜好多時皆因諗多咗啫！文：keymannow TV主持mailto:[email protected]