泛海集團（129）仲喺1年橫行底載浮載沉，超級大折讓兼大落後，抵買。泛海連埋酒店價值蒲面，每股NAV 13蚊，現價（1.34元）折讓，高達90%，現兜兜NAV 1折有售。又泛海揸住包括歐美地區嘅財務資產，值35億銀。不妨好保守咁，將呢筆數全部撇減，每股NAV調整到10.50元，折讓仍然高達87%，離晒大譜。莫忘記，呢期花旗一推QE3，香港樓市火上加油，而泛海所佔香港物業、土地組合，樓面達到136萬平方呎，遠少少嘅澳門，應佔土儲樓面面積，亦上到170萬平方呎。呢批組合嘅升值潛力，肯定唔嘢少，泛海嚟緊日子，肥過肥仔水。呢轉買泛海，真係係咁意博翻半番到1.98元，折讓仲講緊高達85%。
佳景業績靚兼平霸
佳景集團（703）2012年半年度純利6000萬銀，增長咗九成，靚仔到爆。又集團喺濠江餐飲業，有非常優勢，加埋旅業暢旺，就當集團全年度純利起個孖，到1.2億銀，PE得5倍多少少。場內大快活（052）PE上到15倍，龍頭大家樂（341）貼近27倍，佳景平霸。呢轉博佳景翻半番到1.70元，預期PE都未上到雙位數。錢雋