記得郭富城及梁家輝在杜琪峯電影《柔道龍虎榜》中飾演柔道高手，他們在戲中的搏鬥至今仍為人津津樂道。現實中埋身肉搏，要數05年的金馬獎及之後的香港電影金像獎，各自憑《三岔口》及《黑社會》稱帝，各勝一場。勝負未分也許上天想看，安排兩人在電影《寒戰》中再次同場。梁家輝自言當中一場爭辯戲份，尤如拍了一組動作片，城城自爆該場戲拍了21次導演才收貨。要睇輸贏還要留待明年的頒獎禮，由評判團定奪。
撰文：魯萍、溫敏芝
郭富城早前接受訪問宣傳電影《寒戰》，戲中少有地飾演副警務處長，城城認為受角色的設定限制，演出有一定難度：「以往演基層角色，一般警察身份都係普羅大眾所理解，但去到咁高層原來可以做嘅資料搜集唔多，所以導演至要花五年時間去寫劇本，豐富成個故事，我未演過咁位高權重角色，連講話節奏都要小心處理，今次對於我係一次考試，上年10月接到劇本時，本來要排演唱會，我將綵排押後一個月，壓縮排舞時間，一日排8個鐘變成16個鐘，另一個原因係可以同梁家輝做對手戲。」
全場屏息以待
開頭就有場跟家輝的爭執戲，總共拍了21次導演才收貨，城城直認這場戲是演技上的對決，他說：「對白好多，速度好快，拍嘅時候，在場工作人員都唔敢唞大氣，拍完我好有滿足感。」
城城和家輝合作過《柔道龍虎榜》，但對手戲不多，今次可算是補番數。記憶中兩人鬥的又豈止在戲內，05年家輝憑《黑社會》跟城城以《三岔口》同爭金馬影帝，城城後發先至撼贏家輝封帝。他仍記得當時第一時間走到家輝身邊跟他擁抱，而家輝就拍了他一下以示支持。到香港的電影金像獎，戰況逆轉，令到兩人惺惺相惜，多少促成今次的合作，城城笑言：「好演員要不斷付出，磨練自己，有好劇本加上好對手更難得，有實力要有狀態配合，我擺脫以往演過嘅角色，加上家輝天生係一個好演員，有佢互動大家都可以砥礪出演技。」
爭影帝唔會輸
上一次爭影帝各勝一仗，如果《寒戰》令兩人再爭一次，未知鹿死誰手，城城少有大口氣說：「我覺得我唔會輸，我有信心，今次埋身肉搏，實牙實齒。十年前做歌手分一半時間做演員，唔夠時間磨練，隨住不斷啟發，我對每個角色分析力都強咗。」他認為一個好的演員就要有能演好戲的自信，假如這點信心都沒有，那就枉在演藝圈混。
自言處於事業黃金期，城城就為自己跟女友定下4年之約，他說：「心態上我係諗住唔過50歲，家46，仲有4年，結咗婚嘅話，我估我會有小朋友，我都好鍾意小朋友。」
梁家輝演繹過的角色多不勝數，這次接拍兩位新導演陸劍青、梁樂民的電影《寒戰》，同新導演合作，沒有一絲不放心，家輝說：「呢部係一部好新品種嘅地道港式電影，除咗警隊，故事裏面仲有ICAC同保安局，吸引我嘅地方在於劇本，喺我演藝生命能夠喺香港電影呢個低潮時候接到呢部片，同有呢個角色畀我，係我嘅幸運。」
激烈爭吵似打交
家輝與郭富城在戲內同樣擔任副警務處長，戲中以文戲居多的家輝，坦言激烈度不下於拍攝動作片，當中幾場跟城城爭論的戲份，感覺就跟打鬥沒有分別，令他回想當年兩人一起拍杜琪峯的《柔道龍虎榜》。他說：「同阿城喺《柔道龍虎榜》有兩場戲，不過都係好短冇對白，今次先係真正合作。」但其實我注意城城由《父子》開始，對佢真係另眼相看，因為《父子》部戲要去馬來西亞拍幾個月，要放棄晒舞台王者形象，嗰部戲好難演，我知佢接拍，對佢睇法已經唔同，佢唔係踩界玩吓，真係認真㗎喎，嗰時已經有少少期待合作，大家惺惺相惜，今次合作更加肯定對佢嘅睇法。」
情緒波動想息影
家輝早前在威尼斯影展宣傳時，坦言曾想過息影，他說：「退休諗咗好多年，嗰時覺得自己對家庭同身邊人影響好大，爹哋係藝人搞到啲女都有影響，朋友忽然俾人影搞到四散奔逃，搞到越嚟越少朋友。由我個女小學開始，每次有事發生都會咁諗，退休啦，拍埋呢部唔拍喇，拍得咁辛苦為乜，將來都唔知會唔會體弱多病，喺呢啲情緒波動下，就會諗不如退休，不過呢刻嘅我平靜啲，因為啲女都大去晒外國，家最緊要太太冇受影響，橫掂我呢幾年好少產量，暑假、復活節同聖誕節又唔做，想爭取同啲女見面。」
回顧過往影壇成績，影帝級的家輝坦言對獎項一向都沒有追求，但當然有提名有獎是最好，有提名沒有獎都好，就算冇提名亦是好事，因為可以讓你回顧自己去年是否沒有產量，還是做得不夠好，是對自己演出的一個反思，不過每次有提名心中都是興奮的，等宣佈一刻仍會緊張。
劇情簡介：警隊內奸禍港
《寒戰》故事講述衝鋒車內警員被匪徒挾持，當中包括副警務處長李文彬（梁家輝飾）的獨子（彭于晏飾）。下任處長兩大熱門鷹派人物李文彬跟劉傑輝（郭富城飾）希望藉此立功。不過匪徒對警隊內部行動瞭如指掌，在交收贖金時警員徐永基（錢嘉樂飾）殉職，匪徒逃之夭夭。
整個行動令庫房損失八千萬贖金，兩位警員殉職。同時有匿名人士向廉署舉報，懷疑兩位副處長其中一位以權謀私，警隊及香港的管治漏洞被抖出，矛頭直指警隊高層。原來，香港被稱為「最安全的城市」的原因，只是未遇上真正的敵人。
上映日期：10月18日
