F1鬥到新加坡站，麥拿侖同「黑帝」咸姆頓嘅續約進展依然都係冇乜。正當平治向呢位08年世界冠軍，提出一份3年可高達6,000萬鎊（約7.5億港元）合約嘅時候，麥拿侖主席韋馬殊話想咸仔留隊，不過就要佢減薪，一年減500萬鎊；唔係呀話，咸姆頓歌手女友妮歌出個騷都搵唔少啦！
咸姆頓家份年薪1,500萬鎊嘅合約，到今年季尾就會約滿，所以車隊都好想盡快搞掂續約去留住佢。不過，咸姆頓早前講到明，留隊唔係唔得，不過都要睇吓個價錢吸唔吸引先；搞到韋馬殊都好冇癮咁話：「我好肯定佢想要多啲錢，但係都好肯定車隊想畀少啲，做生意係咁㗎啦。」
女友出騷搵唔少
人哋話晒都幫你拎到08年世界冠軍，今屆又都只係稍微落後喺車手榜排第1嘅艾朗素，絕對有機會再贏世界冠軍；而且，睇吓佢歌星女友妮歌，早前喺杜拜出一次騷唱45分鐘，就已經搵到80幾萬鎊；韋馬殊縮皮仲想留住黑帝，真係有難度。
一年搵少500萬鎊，黑帝絕對有理由轉隊，投向平治嘅懷抱；對方開出嘅條件，3年連獎金可以搵到6,000萬鎊，邊個聽到都心動啦。再加上，平治兩位車手舒麥加同羅斯保，前者廉頗老矣，想上頒獎台都難；後者喺F1打滾咗7季，狀態大上大落令到佢到家都做唔到頂級車手。咸仔若果真係加盟平治，做硬頭號車手，唔使成日喺麥拿侖同畢頓爭做「1哥」，諗吓都爽。
呢邊廂就為前途煩惱，嗰邊畢頓唔同喇，就算今季成績唔多好，都仲好happy；皆因佢女友道端謝茜嘉識得佢開心囉。上周五新加坡勁落雨，搞到道端一身短裙look變成落湯雞；畢頓就幫佢搵咗套隊服，仲影相放上Twitter話女友係車隊新試車手，真係恩愛到爆。