英國女歌手Rita Ora今年就威威，佢喺今年之內已經有三首歌打上英國細碟榜冠軍，呢排Rita去咗澳洲度假開心下，噚日仲走咗去一個野生動物園玩。佢夠晒大膽，將條黑媽媽嘅蛇放上頸，不過，呢條肯定係軟皮蛇，Rita攬咗上身之後條蛇頭耷耷，要工作人員抬起佢個頭，Rita自己抬起條蛇身先至影到相。Rita後來又同隻鴕鳥玩，將自己個頭伸向駝鳥個頭度，搞到人頭鳥嘴咁。最後當然要親親澳洲大明星樹熊啦。